26 ng Marso 2010- Hudyat ng opisyal na pangangampanya ng mga lokal na kandidato para sa lokal na posisyon na kinabibilangan ng Konggresista, Gobernador, Bise-Gobernador, Bokal, Mayor, Vice-Mayor at Konsehales na magtatapos sa ika-8 ng Mayo, 2010. Pormal nang makakapangampanya ang tatlong pinakapopular na kandidato sa pagkagobernador at bise gobernador kasama ng kani-kanilang kinabibilangang partido o ticket na sina Jonvic Remulla at Bimbo Bautista ng Nacionalista Party-Magdalo ni Manny Villar at Loren Legarda, Jun De Sagun at Gen. Roger Pureza ng Pwersa ng Masang Pilipino nina Erap Estra at Jojo Binay, gayundin sina Osboy Campaña at Recto Cantimbuhan ng Liberal Party nina Noynoy Aquino at Mar Roxas. Matatandaan na halos tig dalawang ulit nang pumunta sina Erap, Villar at Aquino sa Cavite noong hindi pa pormal na nagbubukas ang pangangampanya sa lokal na posisyon ngunit bahagya nang nagpakita sa eksena ang kani-kanilang mga manok sa iba’t ibang lokal na posisyon. Dahil dito, muling inaasahan ng mga Caviteño ang pagpuntang muli nina Estrada, Villar at Aquino sa Lalawigan ng Cavite upang pormal na itaas ang kamay ng mga lokal na kandidato at magsagawa ng proklamasyon. Mga Prohibisyon Kaugnay nito ang pagbabawal mula Marso 26 hanggang Mayo 10, 2010 ang paghirang o pagtanggap ng empleyado, paglikha o pagpupuno ng mga posisyon, gayundin ang pagbibigay ng promosyon o pagtataas ng pasweldo, umento o mga priobelehiyo batay na rin sa Sec. 261 (g) ng Omnibus Election Code. Hindi na rin maaring magsagawa ng mga pagawaing bayan, maghatid ng mga materyales para sa pagawaing bayan at pagbibigay ng treasury warrants o kaugnay na mga kagamitan para sa posibleng pagganit ng pampublikong pondo sa hinaharap ayon sa Sec. 261 (w). Hindi na rin maaring maglabas, mamigay o paggastos ng pondo ng publiko (Sec. 261 (v) ayon sa Omnibus Election Code. Dapat Abangan! Inaasahang magiging mainit ang giriin ng tatlong pinakamalalaking lokal na grupong politikal sa Cavite dahil na rin sa pagkakaalyado ng mga ito sa tatlong pinakamakapangyarihan at maimpluwensyang Partido-Politikal ng bansa. Mahigpit ang panliligaw ng mga nasyonal na kandidato sa Cavite dahil ito ang may pinakamaraming rehistradong botante sa Luzon na umaabot sa 1,664, 170. Kaya naman, maasahan at dapat abangan ang magagawang pabor ng mga nasyonal na kandidato sa mga lokal na kandidato. Gayundin, ano ang magagawa ng mga local na kandidato sa mga nasyonal na kandidato.
