Hirap na sa pangingisda, hirap pa rin sa iba pang aspeto ng buhay ang nararanasan ng mga taga-Aplayang Munti ng Cavite City. Isa na nga rito ang usapin ng kalusugan, alternatibong mapagkakakitaan, kabuhayan, pagpaplanong pampamilya at seguridad. Unti-unti naman itong tinutugunan ng lokal na pamahalaan.
Ngunit ano pa nga ba ang magagawa kundi pagkasyahin kung ano ang mayroon at sikaping mahagilap ang wala nang sa gayon ay mapag-abot-abot ang pangangailangan. Ito ang buhay na kinagisnan ng karamihan mula sa dati rati’y saganang dalampasigan at karagatan.
Kumapal ang tao. Dumami ang bahay. Bumaha ng basura. Hindi malaman kung ang basurang nasa kanilang mga silong ay galing sa kanila o padpad mula sa mga karatig bayan o lalawigan.
Buhay at Bahay Aplaya
Ngunit ang isa sa pinakamalaki at klasikong problema ng mga mangingisda ng nasabing lugar ay ang katiyakan sa paninirahan. Bagamat ilang dekada nang binabagabag ang mga tagaroon hinggil sa umuugong na bulungan ng banta ng demolisyon, tila multo itong laging dumadalaw sa balibat na isipan ng mga mangingisda.
“Totoong kinalakihan ko na ang bali-balitang made-demolis ang lugar na ito. Tinawanan lang ng iba.Pero may ilan pa ring hindi mapanatag. Lalo na ngayon, parang habang tumatagal at nakikita yung tambak sa Kawit at Bacoor, parang totoo na demolisyon.” Wika ng isang taga-Aplayang Munti na inuban na ang buhok sa pamamalagi sa nasabing pamayanan ng mga mangingisda.
Sa wika ng mga nakatira sa nasabing lugar, handa naman silang makipag-ugnayan at makipagtulungan sa pamahalaan kung talagang kakailanganin ang kanilang aplaya para sa mas ikakaunlad ng Cavite City. Basta’t may malinaw na relokasyon. Mapagkakakitaan at hanapbuhay na marangal. At higit sa lahat, kung aalisin ang isa, dapat alisin ang lahat. Walang palakasan. Walang padri-padrino.
Iba’t ibang samahan ng mga mangingisda ang nabuo sa Aplayang Munti dahil na rin sa uri ng pangingisda at interes sa buhay. At ang bawat samahan, may posibilidad na may ilang interes na isinusulong na posibleng taliwas sa isinusulong ng iba pang samahan. Ito ang kadalasang pinagmumulan ng iringan at pagkakahati-hati. Ngunit sa palagay naman ng iba, may iisang interes na nagbubuklod sa lahat ng mga samahan. Ito ay ang pangalagaan ang kanilang mga sariling sakop at hanay mula sa mga illegal na mangingisda mula sa ibang bayan o lugar.
Pagdating sa isyu ng mga illegal na mangingisda na pumapasok nang sadya o di sadya sa baybayin ng Cavite City, katuwang ng mga taga-Aplaya ang halos lahat ng mga samahang mandaragat sa Lunsod. Lahat ng mga mangingisda at nakatira sa Aplayang Munti ay nagkukusang bantayan ang kanilang karagatan at baybayin laban sa mga mapang-abusong illegal fishing.
Himala ng Buhay sa Munting Aplaya
Isa sa ipinagpapasalamat ng mga taga-Aplayang Munti ay ang kakaibang hubog ng kanilang dalampasigan at lokasyon dahil nakaranas na di umano ang mga tagarito ng malalakas na bagyo at sigwa ngunit kung ihahambing sa iba pang lugar na tabing dagat sa cavite City, higit silang panatag at ligtas. Hindi gaanong nasasalanta.
Nakakaraos at naidaraos pa rin ang buhay. Masaya nilang pinagsasaluhan ang dapit-hapon sa pamamagitan ng kwentu-kwentuhan at umpuk-umpukan matapos ang mabigat na pakikipagbuno sa alon, hangin, sagwan, kawil at lambat.
Karamay ang pangat o paksiw, inihaw o piniritong isdang huli, palalanguyin sa sabaw ang kaning lamig, katuwang ang kape o ilang tagay ng agua de pataranta... pasasaan ba’t bago tuluyang lumatag ang dilim... may naiipon nang lakas ng katawan at loob para harapin ang bagong umaga sa kinagisnang aplaya.
Ibang mga balita...
Mga Artikulo...
|
